Xitoy 2030 yilda yadro qurollari sonini mingtaga yetkazmoqchi — Pentagon
Shuningdek, Pekinning yadro va strategik qurollari kuchayib borayotganligi qayd etildi.
Xitoyning yadroviy va strategik qurollarining katta surʼatda rivojlanishi Qo‘shma shtatlar uchun o‘sib borayotgan tahdid hisoblanadi. Bu haqda AQSH qurolli kuchlarining strategik qo‘mondonligi rahbari admiral Charlz Richard maʼlum qildi.
"XXR yuqori surʼatda o‘z yadro va strategik kuchlarini rivojlantirishda davom etmoqda. Shu bilan birga ularning bu qurollardan qanday maqsadda foydalanishi nomaʼlum. Yaqinda sinovdan o‘tkazilgan gipertovushli qurol — o‘sib borayotgan salohiyatning faqatgina bir misolidir" — degan Richard.
Uning qo‘shimcha qilishicha, Pekin gipertovushli qurolni sinovdan o‘tkazganda, u 40 ming kilometr uzoqlikka uchgan va 100 daqiqadan ortiq havoda qolgan. Bu kabi raketalar hozirda dunyoning hech bir davlatida yo‘q. Richardning qayd etishicha, Xitoy gipertovushli tizim va texnologiyalarga katta mablag‘ ajratmoqda.
"Xitoy shuningdek, plutoniy ishlab chiqarish va boyitishga ham katta eʼtibor qaratmoqda. Bu 2027 yilda 700 ta yadro quroliga ega bo‘lish imkonini beradi. Katta ehtimol bilan XXR 2030 yilda ularning sonini mingtaga yetkazmoqchi", — deb aytgan qo‘mondon.
Xitoyda hozir 350 yadro quroli bor.
Avvalroq AQSH mart o‘rtalarida maxfiy tarzda gipertovushli raketa sinovini o‘tkazgani to‘g‘risida xabar berilgandi.
