Rossiya Inson huquqlari bo‘yicha xalqaro kengashdan chiqarildi
Bu bo‘yicha BMT Bosh Assambleyasining maxsus qarori imzolandi.
Birlashgan Millatlar Tashkiloti Bosh Assambleyasi Ukraina bo‘yicha o‘tkazilgan maxsus sessiyada Rossiyaning Inson huquqlari bo‘yicha kengashidagi a’zoligini to‘xtatib turish to‘g‘risidagi Gʻarb rezolyusiyasini qabul qildi.
Hujjatni qabul qilish uchun ovoz berishda qatnashganlarning uchdan ikki qismi ma’qullashi talab qilingan, betaraf qolganlar esa hisobga olinmagan.
93 ishtirokchi davlat buni yoqlab ovoz bergan, 24 davlat qarshi bo‘lgan, 58 davlat betarafligini bildirgan.
Rossiyaning a’zoligini to‘xtatib turish to‘g‘risidagi qaror faqat joriy rotasiyaga, ya’ni 2023-yilda Rossiya Federasiyasining kengashdagi vakolat muddati tugaguniga qadar amal qiladi. Bundan tashqari, Rossiya Federasiyasi yana a’zolik uchun ariza topshirishi mumkin.
A’zolikning to‘xtatilishi doirasida Rossiya ovoz berish huquqidan mahrum bo‘ladi, ammo Kengash yig‘ilishlarida qatnasha oladi.
