Buyuk Britaniya Putin va Lаvrovning qizlariga nisbatan sankiyalar joriy qildi
Har uchala ayolning Britaniyaga kirishi taqiqlanadi va aktivlari muzlatiladi.
Buyuk Britaniya Rossiya prezidenti Vladimir Putinning ikki qizi va mamlakat tashqi ishlar vaziri Sergey Lavrovning qiziga qarshi sanksiyalar joriy qildi. Bu haqda Britaniya tashqi ishlar vazirligi matbuot xizmati ma’lum qildi.
Qayd etilishicha, Yekaterina Tixonova, Mariya Vorontsova va Yekaterina Vinokurning Buyuk Britaniya hududiga kirishi taqiqlanadi, ularning Britaniyada joylashgan barcha aktivlari muzlatiladi.
"Bizning misli ko'rilmagan sanksiyalar paketimiz elita va ularning oilalariga zarba bermoqda, chunki Rossiya iqtisodiyoti Sovet Ittifoqi qulaganidan beri Rossiya ko'rmagan miqyosda tanazzulga yuz tutmoqda", dedi Britaniya Tashqi ishlar vaziri Liz Truss.
U shuningdek, bu borada yana ko'p ish qilish kerakligini qo'shimcha qildi. Eslatib o'tamiz, bir necha kun avval Putinning qizlari YeI sanksiyalariga tushib qolish xavfi borligi haqida xabar berilgandi.
