Madaniyat instituti talabasi 4 ming dollar pora bilan ushlandi
Hozirda unga nisbatan jinoyat ishi ochilgan.
Toshkent shahrida magistraturaga o‘qishga kiritib qo‘yishni va’da qilgan kafedra mudiri va uning sherigi ko‘lga olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Qayd etilishicha, O‘zbekiston davlat san’at va madaniyat institutining talabasi fuqaroni institut kafedra mudiri orqali magistratura bosqichiga o‘qishga kiritib qo‘yishni va’da qilib, evaziga 4 000 AQSH dollarini olgan vaqtida ushlangan.
Shundan so‘ng uning ko‘rsatuviga asosan davom etgan tezkor tadbirda kafedra mudiri talabadan 4 000 AQSH dollarini olgan paytida ashyoviy dalillar bilan qo‘lga tushgan.
Hozirda mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari olib borilmoqda.
