O‘zbekistonda Suv akademiyasi tashkil etiladi
Bu bo‘yicha Prezident qarori loyihasi muhokamaga qo‘yildi.
Prezidentning “Suv ta’minoti sohasida malakali xodimlarni tayyorlash tizimini rivojlantirish chora-tadbirlari to‘g‘risida”gi qarori loyihasi jamoatchilik muhokamasiga qo‘yildi.
Unga ko‘ra, suv zaxiralaridan oqilona va samarali foydalanish, boshqaruv kadrlari va mutaxassislarni qayta tayyorlash, ularning professional saviyasini oshirish tizimini xalqaro standartlarga muvofiq tubdan takomillashtirish, soha menejmentida zamonaviy usullarini joriy etishni qo‘llab-quvvatlash maqsad qilib olingan. Shu sababli yagona ilmlar markaz – Suv ta’minoti sohasida mutaxassislarni tayyorlash va malakasini oshirish akademiyasi tashkil etiladi.
“O‘zsuvta’minot” AJ Suv akademiyasining muassisi hisoblanadi va faoliyatini muvofiqlashtirib boradi. Suv akademiyasi O‘zbekiston Respublikasi hamda xorijiy oliy ta’lim muassasalari tinglovchilari hamda mustaqil tadqiqotchilar uchun suv ta’minoti sohasida ilmiy-amaliy izlanishlar orqali ilmiy daraja olish huquqini beruvchi ta’lim muassasasi hisoblanadi.
Suv akademiyasiga 2023/2024-o‘quv yilidan boshlab vazirliklar, idoralar va tadbirkorlik subektlarining ehtiyojlari va strategik rivojlanishidan kelib chiqqan holda, sohaviy xorijiy ta’lim muassasalari bilan hamkorlikda ilmiy hamda muhandis-texnik kadrlarni tayyorlashni tashkil etish huquqi beriladi.
Akademiya Toshkent shahri Yunusobod tumani Bog‘ishamol ko‘chasi, 151-uy manzilda joylashtiriladi. Davlat aktivlarini boshqarish agentligi hamda Toshkent shahar hokimligi yig‘imlar va boshqa to‘lovlar undirmasdan ushbu manzilda joylashgan “Musaffo obi hayot” MCHJning 1,4 ga yer maydoni hamda ko‘chmas mulk obektlariga bo‘lgan huquqlarini (davlat ulushini) Suv akademiyasi tasarrufiga o‘tkazadi.
