Turkiya Ukrainaga yetkazib bergan “Bayraktar TB2” uchuvchisiz qurilmalari taqdiri nima bo‘ldi?
Rossiya ularning katta qismini yo‘q qilgani aytilmoqda.
Ukrainadagi harbiy mojaro boshlanishidan ancha oldin Vladimir Zelenskiy Rajab Toyyib Erdo‘g‘an bilan “Bayratkar TB2” qurilmalari bo‘yicha kelishuvga erishgan edi. Shundan keyin Kiyev ushbu zarbdor qurilmalarning faol xaridoriga aylangan.
24-fevral kuni Rossiya bilan harbiy mojaro boshlangach, Ukraina qurolli kuchlari “Bayraktar”lardan keng foydalandi. Shunday bo‘lsada, bir oydan so‘ng, 25-martga kelib Rossiya Federasiyasi Kiyevda mavjud bo‘lgan qurilmaning 35 tasi yo‘q qilinganini ma’lum qildi.
Bundan tashqari, 25-martdan 9-aprelga qadar kamida sakkizta “Bayraktar” urib tushirilgan.
“Reuters” agentligi ma’lumotlariga ko‘ra, Turkiyaning Baykar harbiy kompaniyasi Ukraina armiyasiga “Bayraktar”lar yetkazib berish bo‘yicha qo‘shimcha kelishuvga erishganini aytmoqda.
Moskva noroziliklariga javoban, rasmiy Anqara bu kelishuv xususiy korxonaga tegishli ekanini ta’kidlab keladi. Turkiya hukumatining pozisiyasi esa ikki urushayotgan davlatlar o‘rtasidagi muloqotni tiklash ekanligi qayd etilgan.
