Turkiya qiruvchi samolyotlar tufayli AQSHga “shantaj” qildi
Vashington Anqaraga F-16 yetkazib berishni ortga surmoqda.
AQSH kongressi Turkiyaga F-16 qiruvchi samolyotlarini sotishni inkor qilsa, Anqara Rossiyaning Su-57 samolyotlarini xarid qilishni ko‘rib chiqishi mumkin. bu haqda Milliyet gazetasi xabar berdi.
Turkiya Vashingtondan 40 dona F-16 Block 70 samolyotlarini so‘ragan. Gazeta maʼlumotlariga ko‘ra, bu so‘rov javobsiz qoldiriladigan bo‘lsa, Anqara Moskva bilan Su-57 bo‘yicha muzokaralarni boshlashi mumkin.
Shuningdek, Fransiya va Buyuk Britaniyadan ham qiruvchi uchoqlar sotib olish ko‘rib chiqilmoqda. Shu bilan birga Kongress bu kelishuvni tasdiqlagan taqdirda Turkiyaning o‘zi ishlab chiqayotgan TF-X samolyotlari qurollanishga qabul qilingunga qadar mamlakat ehtiyojlari qoplanishi maʼlum qilingan.
AQSH 2019 yilda Turkiyaning Rossiya tomonidan ishlab chiqarilgan S-400 tizimlarini sotib olganiga javoban, F-35 qiruvchi samolyotlarini sotib olishni taqiqlab qo‘ydi. Shundan keyin Anqara F-16bo‘yicha so‘rov yuborgan. Ammo bu hamon javobsiz qolmoqda.
Avvalroq Turkiya Ukrainaga qo‘shimcha uchuvchisiz qurilma yetkazib berishi to‘g‘risida xabar berilgandi.
