"Ukraina bilan muzokaralar boshi berk ko‘chaga kirgan" — Putin
Rossiya yetakchisi Ukrainada sodir bo‘layotgan voqealar fojia, lekin Rossiyada boshqa tanlov yo‘qligini aytdi.
"Rossiya va Ukraina o‘rtasidagi urushni tugatish bo‘yicha muzokaralar to‘xtab qoldi. Kiyev tomonlar o‘rtasida Istanbuldagi muzokaralarda erishilgan kelishuvlardan uzoqlashdi va boshi berk ko‘chaga kirdi", — dedi Putin.
Kreml rahbarining qo‘shimcha qilishicha, kecha unga Kiyevning muzokaralardagi pozitsiyalarida yangi o‘zgarishlar bo‘lgani haqida xabar berilgan. Shuningdek, Putinning aytishicha, Belarus muzokaralar uchun juda mos.
"Fursatdan foydalanib, belaruslik hamkasblarga o‘z hududida bir necha muzokaralar raundlarini yaxshi tashkil etgani uchun o‘z minnatdorchiligimni bildirmoqchiman”, — dedi u Belarus rahbari Aleksandr Lukashenko bilan muzokaralar yakunida.
Uning so‘zlariga ko‘ra, Ukraina tomoni bilan to‘g‘ridan-to‘g‘ri muloqotni boshlash ko‘p jihatdan Belarus prezidentining shaxsiy saʼy-harakatlari tufayli bo‘ldi.
