Yuridik universitet rektori jarimaga tortildi
Oliygoh rahbariyati madaniy merosdan foydalanish qoidalarini buzgani uchun sud qilingan.
Toshkent davlat yuridik universiteti rektori ma’muriy javobgarlikka tortildi. Bu haqda Bosh prokuratura matbuot xizmati xabar berdi.
Qayd etilishicha, “Sayilgoh” ko‘chasida joylashgan, XIX asrga oid betakror arxitektura yodgorligi bo‘lgan (sobiq Erkaklar va Ayollar gimnaziyasi) Toshkent Davlat yuridik universiteti tomonidan foydalanib kelinayotgan binolar mutaxassislar tomonidan o‘rganilganida, tegishli ruxsatnoma olinmasdan, bino devorlari teshilib qayd etish taxtachalari o‘rnatilgani va atroflari bo‘yalgani, sovutkich (kondisioner) dvigatellari hamda soyabonlar o‘rnatilgani aniqlangan.
Oliygoh rahbariyati tomonidan qonun buzilishi holatlarini bartaraf etish to‘g‘risidagi ko‘rsatma bajarilmagani sababli ma’muriy bayonnoma rasmiylashtirilib, sudga taqdim qilingan.
Jinoyat ishlari bo‘yicha Yunusobod tuman sudining 31.03.2022 yilgi qarori bilan oliygohning mas’ul rahbari ma’muriy javobgarlikka tortilib, bazaviy hisoblash miqdorining 3 baravari miqdorida jarima qo‘llanildi.
