Eronda Mirzo Ulug‘bek va Alisher Navoiy bitiklari aniqlandi
Hozirda ulug‘ allomalarimiz bitiklarini ilmiy jihatdan o‘rganishga doir ishlar olib borilmoqda
Turizm va madaniy meros vazirligi huzuridagi Madaniy meros agentligi jamoasi tomonidan O‘zbekistonning Erondagi elchixonasi ko‘magida amalga oshirgan xizmat safari davomida Mirzo Ulug‘bek va Alisher Navoiy bitiklari topildi. Bu haqda Turizm va madaniy meros vazirligi xabar bermoqda.
“Eronning shimoli-g‘arbida Temuriylar davrining ko‘plab madaniy meros obidalari mavjud. Amir Temur Eronga tashrifi davomida Mashhad provinsiyasidagi Toyinobod shahrida shayx Abu Bakr Zayn-ul Obiddin Toyyibiniy bilan uchrashgan va u bilan do‘stlashib qolgan. Uzoq yillar davomida u bilan yozishib turgan. Ushbu do‘stlik hurmati Amir Temurning o‘g‘li Shohrux Mirzo Toyinobod shahrida ajoyib masjid qurdiradi. Masjid bugungi kunga qadar saqlanib qolgan va ko‘plab allomalarimizning do‘stona munosabatlarini o‘zida muhrlagan. Shunisi diqqatga sazovorki, ko‘p hukmdorlar va taniqli arboblar bu masjidga kelib, namoz o‘qishni o‘zlari uchun sharaf deb bilishgan. Masjidning devorida yuqori martabali mehmonlar uchun hurmat devori bo‘lib, ularda mehmonlar o‘z tilaklari yoki bitiklarini yozib qoldirishgan. Ularni ko‘zdan kechirayotib, ajoyib yangilik – Mirzo Ulug‘bek va Alisher Navoiy bitiklarini kashf etdik”, — dedi agentligi direktori birinchi o‘rinbosari T.Qo‘ziyev.
Xabarga ko‘ra, ayni damda ulug‘ allomalarimiz bitiklarini ilmiy jihatdan o‘rganishga doir ishlar olib borilmoqda.
