Bizga dushmanning keragi yo‘q
Buxorodagi “Sitorai Mohi Xossa” saroyini restavratsiya qilish ishlari noto‘g‘ri olib borilgani uchun saroyning bir qator qismi tarixiy va badiiy ahamiyatini butkul yo‘qotgan.
Vazirlar Mahkamasining Madaniy merosni himoya qilish inspeksiyasi hamda Madaniy meros agentligi tomonidan "Sitorai Mohi Xossa" tarixiy majmuasidagi restavratsiya ishlari holati o‘rganildi. O‘rganish davomida taʼmirlash ishlari madaniy meros obektlarini restavratsiya qilish talablariga zid ravishda olib borilgani aniqlandi.
Maʼlum bo‘lishicha, taʼmirlash-restavratsiya loyihalari maxsus Ilmiy-ekspert kengashi bilan kelishilmagan, tegishli ruxsatnomalar olinmagan va yana bir qator talablar qo‘pol ravishda buzilgan. Majmuada restavratsiya ishlari noto‘g‘ri olib borilgani tufayli saroyning bir qator qismi tarixiy va badiiy ahamiyatini butkul yo‘qotgan.
Agentlik tomonidan o‘rganish ishlari yakunlari huquqiy baho berish uchun Bosh prokuraturaga taqdim etildi. Ayni vaqtda Bosh prokuratura tomonidan mazkur holatlar bo‘yicha mutasaddi mansabdor shaxslarga nisbatan jinoyat ishi qo‘zg‘atildi.
