Ohangaronda yuk avtomobili ag‘darilib ketdi
Hodisa oqibatida haydovchi voqea joyida vafot etgan.
Ijtimoiy tarmoqda Toshkent viloyatining Ohangaron tumanida yuk avtomobili dumalab ketgani aks etgan video tarqaldi. Holat yuzasidan YHXX rasmiy ma’lumot berdi.
Qayd etilishicha, voqea bugun, 15 aprel kuni soat 17.40 atrofida tumaniing “Guliston–Bo‘ka–Angren–Qo‘qon–Andijon–O‘sh” yo‘nalishida yuz bergan. Yo‘lning 201-kilometrida “DAF” rusumli yuk mashinasida harakatlanib borayotgan haydovchi keskin burilish joyida boshqaruvni yo‘qotgan va qarama-qarshi oqimni ajratib turuvchi beton to‘siqqa borib urilgan.
Hodisa oqibatida haydovchi olgan og‘ir tan jarohatlari tufayli voqea joyida vafot etgan.
Hozirda mazkur YTH yuzasidan Ohangaron tumani IIB huzuridagi TB tomonidan tergovoldi surishtiruv harakatlari olib borilmoqda.
