Yaponiya Rossiyaning raketa sinovlari to‘g‘risida maʼlumot to‘play boshladi
Payshanba kuni RF Tinch okeanida qanotli raketalar uchirgandi.
Yaponiya Rossiyaning Tinch okeanida o‘tkazgan raketa sinovlari yuzasidan maʼlumot to‘plashni boshladi. Bu haqda mamlakat mudofaa vaziri Nobuo Kisi maʼlum qildi.
RF Tinch okeani floti payshanba kuni ikki suvosti kemasidan Yapon dengizida “Kalibr” qanotli raketalarini uchirgan edi. Moskva ularning muvaffaqiyatli o‘tganini taʼkidlagan.
"Bizning mamlakatimizga yaqin joylashgan hududlarda Rossiya qurolli kuchlarining faolligi oshdi. Bu yangi qurollarni joylashtirish va harbiy mashg‘ulotlarni o‘tkazishni o‘z ichiga oladi. Biz xavotir bilan so‘nggi raketa sinovlari yuzasidan maʼlumot to‘playapmiz va xavfsizlik choralarini kuchaytirmoqdamiz", — degan Yaponiya mudofaa vaziri.
Avvalroq AQSH mart oyida gipertovushli raketa sinovini o‘tkazgani to‘g‘risida xabar berilgandi.
