Parkentda o‘qituvchilar hokimlikning Telegram kanaliga majburiy obuna qilinmoqda
Bu bo’yicha tuman hokim o’rinbosari o’qituvchilarga topshiriq bergan.
Ijtimoiy tarmoqlarda Parkent hokimi o‘rinbosari Baxtiyor Soatovning tumandagi o‘qituvchilar bilan zoom platformasi orqali o‘tkazgan yig‘ilishi videosi tarqaldi. Unda hokim o‘rinbosarining o‘qituvchilarga turli Telegram-kanallarga majburan obuna qilish bo‘yicha topshiriq berayotganini ko‘rish mumkin.
“Uchta kanalimiz bor. Birinchisi, Parkent hokimiyatining Telegram-kanali, ikkinchisi “Parkent tongi” Telegram-kanali va uchinchisi Shohrux Shoahmedovning Facebook kanali.
Mana, mana shu uchtaga obuna bo‘lib berasizlar, 100 foiz maktab o‘qituvchilari. To‘g‘ri, 100 foiz maktab o‘qituvchilarida boya Zokir akam aytganidek, Telegram yoki Facebook bo‘lmasligi mumkin, lekin qolgan hammasida 100 foiz telefon bor”, – degan Baxtiyor Soatov.
Hokim o‘rinbosariga ko‘ra, o‘qituvchi va o‘quvchilarning aytilgan kanallarga a’zo bo‘lish jarayonini shaxsan tuman hokimi ham ismma-ism nazorat qilib bormoqda.
Mutasaddi bu ishlar tumanning kanaliga “podpischik” ko‘paytirish uchun emas, balki hududda olib borilayotgan ishlarni ko‘rsatish uchun qilinayotganini bildirib o’tgan.
