Qashqadaryoda o‘z joniga qasd qilgan erkak haqida qo‘shimcha ma’lumot berildi
Oxirgi vaqtlarda marhum ko‘p spirtli ichimlik iste’mol qilgan va oqibatda uning ruhiyatida o‘zgarish bo‘lgan.
Avvalroq Qashqadaryo viloyatida 37 yoshli erkak o‘zini osib qo‘yganligi haqida xabar berilgandi. Holat yuzasidan Bosh prokuror matbuot kotibi Hayot Shamsutdinov rasmiy izoh berdi.
Qayd etilishicha, 13-aprel kuni Gʻuzor tumani “Sovbog‘” qishlog‘ida yashagan 1985-yilda tug‘ilgan erkak (oilali, 3 nafar farzandi bor, mahalla fuqarolar yig‘inida yoshlar yetakchisi bo‘lib ishlagan) qo‘shnisining yashamaydigan xonadonida o‘zini-o‘zi osib, vafot etgan.
Tekshirish davomida marhum oxirgi vaqtlarda ko‘p spirtli ichimlik iste’mol qilishi oqibatida ruhiyatida o‘zgarish bo‘lganligi aniqlangan.
Marhumning o‘lim sababiga aniqlik kiritish maqsadida sud-tibbiy ekspertizasi tayinlangan.
Hozirda holat bo‘yicha Gʻo‘zor tumani prokuraturasi tomonidan tergovga qadar tekshiruv harakati olib borilmoqda.
