Saudiya Arabistoni Yaman prezidentini isteʼfoga chiqishga majbur qilgan — WSJ
Ar-Riyodda 30 mart — 7 aprel kunlari Yaman bo‘yicha muzokaralar bo‘lib o‘tgandi.
Yaman prezidenti Abd Rabbo Mansur Xadi Saudiya Arabistoni bosimi ostida isteʼfoga chiqqan. Bu haqda The Wall Street Journal gazetasi xabar berdi.
Gazetaning Yaman va Saudiya amaldorlariga asoslanib tarqatgan maʼlumotlariga asosan, Ar-Riyodda Yaman nizosi tomonlari o‘rtasida bo‘lib o‘tgan muzokaralarda Saudiya Arabistoni valiahd shahzodasi Muxammad bin Salmon prezidentga o‘z vakolatlarini topshirish bo‘yicha hujjat taqdim etgan. Shuningdek, u muzokaralarning barcha ishtirokchilari Xadining isteʼfosiga rozilik bildirganini aytgan. Gazeta manbalari, shuningdek, saudiyaliklar Yaman yetakchisiga uning korrupsiyaga aloqadorligini tasdiqlovchi hujjatlarni oshkor qilish bilan tahdid qilganini qayd etishgan.
7 aprelga o‘tar kechasi Xadi Prezident boshqaruv kengashi tuzilganini va o‘zining barcha vakolatlarini o‘tish davrida ushbu tuzilmaga topshirishini eʼlon qildi. Kengash rahbari etib Rashod Muhammad al-Alimiy tayinlangan. U Saudiya Arabistoni bilan qalin aloqalarga ega deb taxmin qilinadi.
Yamanda fuqarolar urushi 2014 yildan buyon davom etmoqda. 2015 yilda Saudiya Arabistoni boshchiligida koalitsiya markaziy hukumat tomonida urushga qo‘shildi. Ushbu nizo yirik gumanitar inqirozga olib keldi. BMT maʼlumotlariga ko‘ra, 24 million yamanlik (aholining 80 foizi) gumanitar yordamga muhtoj.
Avvalroq Saudiya neft obyektlariga Yaman xusiylari hujum uyushtirgani to‘g‘risida xabar berilgandi.
