Sher tishlab olgan bolaning sog‘ligi haqida ma’lumot berildi
Hozir uning umumiy ahvoli nisbatan qoniqarli.
Ijtimoiy tarmoqda 7 aprel kuni Toshkent tumanidagi uylarning birida noqonuniy boqilayotgan sher bolasi soat 17:30 larda onasi va homilador yangasi bilan do‘konga sut olish uchun chiqqan bolakayga hujum qilgani haqida xabarlar tarqaldi.
Qayd etilishicha, to‘satdan orqa tomondan kelib tashlangan yirtqich bolaning bosh va yelka qismini tishlay boshlagan. Ona farzandini sher og‘zidan qutqarib qolgan. Voqea kechki payt, sherning egalari jonivorni uydan tashqariga aylantirish uchun olib chiqqan paytda yuz bergan.
Bolakay Mirzo Ulug‘bek tumanida joylashgan 2-son bolalar jarrohlik klinik shifoxonasiga “Boshning tepa sohasida, o‘ng yelkaning tepa uchligida va iyak qismida tishlangan jarohatlar“ tashxisi bilan stasionar davolanish uchun yotqizilgan.
Unga quturishga qarshi antirabik vaksina qo‘llanilib, jarohatlarga birlamchi jarrohlik ishlovlari berilgan. Patologik sinish alomatlari kuzatilmagan. Yosh bemor neyroxirurg, nevrapatolog va pediatr kabi qator mutaxassislar tomonidan konsultatsiya qilingan.
Hozir bolakayning umumiy ahvoli nisbatan qoniqarli. Davo muolajalari reja asosida davom ettirilmoqda.
Sog‘liqni saqlash vazirligi bemorning ahvolini nazoratga olgan. 2-sonli klinik shifoxonaning travmatologiya va neyroxirurgiya bo‘limi boshlig‘i Ismat Nig‘matov hamda Respublika bosh rabiologi Saidvoris Gʻaniyev tomonidan bemorning holati muntazam tarzda tekshirib borilmoqda.
