Ohangaronda ishga kiritish uchun pora talab qilgan shaxslar ushlandi
Ular 1,5 ming dollar pora bilan qo‘lga tushgan.
Ohangaronda fuqaroni 3 ming AQSH dollari evaziga ishga kiritib qo‘yishni va’da qilgan firibgarlar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Qayd etilishicha, Departamentning Ohangaron tuman bo‘limi va DXX xodimlari tomonidan tezkor tadbir o‘tkazilgan. Aniqlanishicha, 2 nafar shaxs o‘zaro til biriktirib, bir nafar fuqaroni tanishlari orqali “Olmaliq tog‘-kon metallurgiya kombinati”ga ishga kiritib qo‘yishni va’da qilgan va buning evaziga undan 3 ming AQSH dollari talab qilishgan. Tezkor tadbirda ular kelishilgan pulning 1,5 ming AQSH dollarini olayotgan vaqtida ashyoviy dalillar bilan qo‘lga tushishgan.
Hozirda mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
