Yakshanba kuni O‘zbekistonda kuchli yomg‘ir yog‘ishi kutilyapti
Bu bo‘yicha “O‘zgidromet” shoshilinch axborot bilan chiqdi.
“O‘zgidromet”ning xabar qilishicha, 25-aprel, yakshanba kuni nam havo massasi O‘zbekistonning barcha hududlarini qamrab oladi. Toshkent, Samarqand, Jizzax, Sirdaryo va Farg‘ona vodiysi viloyatlarining ba’zi joylarida kuchli yomg‘ir yog‘adi.
Shuningdek, 24-25 aprel kunlari tog‘oldi va tog‘li hududlarda sel kelishi xavfi mavjud.
“Tog‘oldi va tog‘li hududlarda istiqomat qiluvchi fuqarolardan, shuningdek, dam oluvchilar va tog‘li hududlarda harakatlanuvchi haydovichilardan ehtiyotkorlik choralarini ko‘rishlarini so‘raymiz”, — deyiladi rasmiy xabarda.
Avvalroq Jizzaxda kuchli sel yog‘ishi oqibatida 4 kishi halok bo‘lgani xabar qilingandi.
