Qozog‘istonda bitiruv kechasini restoranda o‘tkazish taqiqlanadi
Epidemiologik vaziyat yaxshilangani munosabati bilan joriy yilda bitiruv kechalari o‘tkaziladi. Ammo bu tadbirlarning barchasi maktab ichida o‘tkazilishi kerak.
Bu haqda Qozog‘iston Taʼlim va fan vazirligining Maktabgacha va o‘rta taʼlim qo‘mitasining tarbiyaviy ishlar va qo‘shimcha taʼlim boshqarmasi boshlig‘i Samal Qadirova maʼlum qildi.
"Maʼlumki, maktab o‘quvchilari maktabni bitirishni intiqlik bilan kutmoqda, chunki bu yoshlarning yangi hayotga qadam qo‘yganini bildiradi. So‘nggi ikki yil ichida koronavirus epidemiyasi maktablar va o‘qituvchilar uchun anʼanaviy xayrlashuv kechalarini o‘tkazishga yo‘l qo‘ymadi. Bugungi kunda epidemiologik vaziyat bitiruv kechasi o‘tkazish imkonini beradi. Ammo butun oqshom maktabda o‘tishi kerak. Maktab vasiylik kengashlari va taʼlim bo‘limlari bitiruvchilarning ota-onalariga ushbu tadbirlarga sarflanayotgan mablag‘ behuda ketishini tushuntirishlari zarur. Bu kun tartibidagi asosiy masalalardan biri", — dedi Samal Qadirova.
Taʼlim va fan vazirligi tavsiyalariga ko‘ra, bitiruv kechasi taʼlim tashkiloti tomonidan tashkil etilishi kerak.
Quyidagi masalalarga ruxsat berilmaydi:
— bayram tadbirlariga animatorlar, dam olish agentliklari, pullik rassomlar, xususiy studiyalarni jalb qilish;
— bayram dasturxoni tashkil etish;
— avtomashinalarni ijaraga olish va shahar (tuman) bo‘ylab ekskursiyalar o‘tkazish; - maktab maʼmuriyati va o‘qituvchilariga sovg‘alar olish uchun mablag‘ to‘plash;
— ko‘ngilochar muassasalarda bitiruv kechalari o‘tkazish.
Maʼlumot o‘rnida: Qozog‘istonning barcha maktablarida so‘nggi qo‘ng‘iroq 2022 yil 25 may kuni bo‘lib o‘tadi. Attestatlar 2022 yil 16-17 iyun kunlari tantanali ravishda topshiriladi.
