Toshkentda “Hududgaz” xodimi pora bilan qo‘lga tushdi
U tadbirkordan 1100 AQSH dollari talab qilgan.
Yunusobod tumanida tadbirkordan 1100 AQSH dollari talab qilgan muhandis ushlandi, deya xabar bermoqda Iqtisodiy jinoyatlarga qarshi kurashish departamenti.
Qayd etilishicha, tadbirkorlik subyektlarining huquqlarini himoya qilish yuzasidan o‘tkazilgan tezkor tadbirda “Xududgaz poytaxt” gaz ta’minoti filiali “Yunusobod tumangaz” bo‘limining ulgurji iste’molchilar bo‘limi muhandisi pora bilan qo‘lga tushgan.
U tadbirkorga tegishli savdo shahobchasiga tabiiy gaz tarmog‘ini o‘tkazib berish hamda loyiha hujjatlarini tayyorlash evaziga 1100 AQSH dollari talab qilgan. Dastlab xodim kelishilgan pulning 100 AQSH dollarini qo‘lga kiritib, yana 900 AQSH dollarini olgan vaqtida ashyoviy dalillar bilan ushlangan.
Hozirda mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Eslatib o‘tamiz, avvaloq Toshkent tumani hokim yordamchisi 30 ming AQSH dollari pora bilan qo‘lga olingani xabar qilingandi.
Javohirbek TURSUNOV
