Toshkentda OITSga chalingan shifokor stomatologik xizmat ko‘rsatib kelayotgani aniqlandi
U bu kasallikni Instagram orqali tanishgan qizidan yuqtirib olgan.
Toshkentda 29 yoshli yigit Instagram ijtimoiy tarmog‘i orqali tanishgan qizdan kasallik yuqtirib oldi. Bu haqda Toshkent shahar IIBB ma’lumot berdi.
“Ikki marta ko‘rishganman. Shu bilan qaytib uchrashmadik. 2 oylardan keyin tekshirtirganimda, shunaqa kasallik (OITS – tahr.) kelib chiqdi”, — deydi yigit.
2021-yilning dekabr oyida Toshkent shahar OITSga qarshi kurashish markazi xodimlari tomonidan yigit nazoratga olinib, shu kuni shifokor tomonidan unga OITS kasalligi va uni yuqtirish yo‘llari haqida tushuntirish berilgan.
Agarda u bila turib, boshqalarga ushbu kasallikni yuqtirish yoki yuqtirish xavfi ostida qoldirgan taqdirda, jinoiy javobgarlikka tortilishi haqida rasman ogohlantirilgan.
O‘tkazilgan tezkor tadbir davomida fuqaro o‘zida OIV va OITS infeksiyasi bilan kasallanganligini bila turib, O‘zbekiston Respublikasi Sog‘liqni saqlash vazirligining tegishli buyruqlari va talablarini buzgan holda taqiqlangan kasbiy faoliyat (stomotolog sifatida) bilan shug‘ullanib kelayotgani aniqlangan.
“Eng yomoni – hech kimga ayta olmasliginingiz. Uylanaman, deb endi yurgandim. Mana bu narsa bo‘lganidan keyin odam yomon tushkunlikka tushib qolarkan. Bir oylab uxlamadim. Uyqu ham, halovat ham bo‘lmadi”, — degan yigit.
Hozirda makur holat yuzasidan unga nisbatan Jinoyat kodeksining 113-moddasi (“Tanosil yoki OIV, OITS kasalligini tarqatish”) bo‘yicha ish ochilib, tergov harakatlari olib borilmoqda. Ushu moddaga ko‘ra, yigit 5 yilgacha ozodlikdan mahrum qilinishi mumkin.
