Pekinda karantin kuchaytirildi
So‘nggi sutkada Xitoyda 21 mingdan ortiq kasallanish holati aniqlangan.
COVID-19 holatlari soni ortib borayotgani sababli Pekin epidemiyaga qarshi choralarni kuchaytirmoqda. Chaoyan tumanidagi sakkizta mikrorayon shanba kunidan beri koronavirus uchun sinovdan o‘tkazildi.
“Epidemiologik tekshiruvning dastlabki natijalari shuni ko‘rsatadiki, kasallikning hozirgi to‘lqini taxminan bir hafta davomida yashirin ravishda tarqalmoqda”, - dedi Pekin Kasalliklarni nazorat qilish va oldini olish markazi direktori o‘rinbosari.
Shahar rasmiylari aholini o‘ta zarurat bo‘lmasa, Pekinni tark etmaslikka, odamlar gavjum joylarga bormaslikka, shuningdek, COVID-19 yuqtirish xavfi o‘rtacha yoki yuqori bo‘lgan hududlarga sayohat qilmaslikka chaqirmoqda.
Rasmiy ma’lumotlarga ko‘ra, joriy yilning 1-martidan buyon Xitoyning materik qismida jami 600 mingga yaqin koronavirus yuqtirish holati qayd etilgan.
Kontinental Xitoyda epidemik vaziyat og‘irligicha qolmoqda. O‘tgan sutka davomida mamlakatda 21 796 ta holat, shundan 21 058 tasi Shanxayda qayd etilgan.
