“O‘zbekiston — mintaqaning markaziy iqtisodiyoti” — Denis Manturov
Bugun Toshkentda yana bir yirik xalqaro tadbir o‘z ishini boshladi.
Ikkinchi marta o‘tkazilayotgan “INNOPROM. Markaziy Osiyo” xalqaro sanoat ko‘rgazmasida Rossiya, Belarus, Fransiya, Germaniya, Chexiya, Yaponiya, Ozarbayjon, Armaniston va boshqa davlatlar ishtirok etmoqda.
O‘tgan yili Toshkentda ilk bor o‘tkazilgan ko‘rgazma yakunida 3,2 milliard dollarlik investision kelishuv imzolangandi. Joriy yili bu kabi kelishuvlar hajmi kengayishi kutilmoqda.
Jahon iqtisodiyotidagi keskin burilishlar tobora yangi sharoitlarga moslashishga majbur qilmoqda. Ochilish marosimida qayd etilganidek, yildan-yilga ishlab chiqarish markazlari, TEXNOLOGIYALAR va investisiyalar Gʻarbdan Sharqqa, Yevropadan Osiyoga ko‘chmoqda.
Ko‘rgazma ochilish marosimida so‘zga chiqqan bosh vazir o‘rinbosari — investisiyalar va tashqi savdo vaziri Sardor Umrzoqov bugungi kunda butun dunyoda savdo hamda iqtisodiy aloqalar shart-sharoitlari o‘zgarib borayotganini qayd etdi. Uning so‘zlariga ko‘ra, so‘nggi ikki yildagi global iqtisodiyotidagi jarayonlarning o‘zi yaqin iqtisodiy hamkorlar bilan birga mavjud imkoniyatlardan foydalanishga undamoqda.
“Biz bugun O‘zbekistonda sanoat salohiyatini, qo‘shimcha qiymatli mahsulotlar zanjirini yaratish, shuningdek, ichki va tashqi bozorda katta talabga ega mahsulotlari ishlab chiqarish bilangina muvaffaqiyatga erishish, iqtisodiy o‘zishga erishish mumkinligini yaxshi anglaymiz”, — deya ta’kidladi vazir.
Ko‘rgazmada Rossiya delegasiyasiga boshchilik qilayotgan RF sanoat va savdo vaziri Denis Manturov ham sanoat kooperasiyasi muhimligini aytdi.
“Global iqtisodiyotdagi jarayonlar bizga kooperasiya, logistika, savdo-iqtisodiy aloqalarni qanday rivojlantirish bo‘yicha yo‘l-yo‘riq ko‘rsatmoqda”, — dedi u.
Shuningdek, Denis Manturov O‘zbekistonning iqtisodiy salohiyatiga alohida to‘xtaldi.
Rossiya vaziri milliy valyutalarda savdo qilish zarurati haqida gapirdi. Uning so‘zlariga ko‘ra, bu yanada mustaqil bo‘lish imkonini beradi. Bu nafaqat dollar, balki yevroning ham ulushini kamaytirishni nazarda tutadi.
Sanoat ko‘rgazmasi 27-aprelgacha davom etadi.
