Chiroqchida kuchli sel kelishi kuzatildi
Hodisa oqibatda aholi xonadonlari va maktab binosi zararlangan.
24 aprel kuni Qashqadaryo viloyatining Chiroqchi tumanidagi “Quruqsoy” mahallasida kuchli sel kelishi bilan bog‘liq favqulodda holat kuzatilgan. Bu haqda viloyat FVV xabar qildi.
Hodisa oqibatida “Govxona” qishlog‘i hududidagi 2 ta aholi yashash xonadonlariga sel suvlari to‘planib qolgan. Shuningdek, 60-sonli maktab hududini o‘rab turgan 15 metr masofadagi chegara devorlariga ziyon yetgan.
Bundan tashqari, fuqaro tomonidan sel yo‘nalishi bo‘ylab qurib olingan molxona va somonxona ag‘darib, yaroqsiz holatga kelib qolgan.
Mutaxassislar bergan ma’lumotlariga ko‘ra, mazkur qishloq ichidan o‘tuvchi suv ariqlari yillar davomida tozalanmaganligi hamda ichki yo‘llardan o‘tuvchi ariq suvlarini yo‘naltirishga mo‘ljallangan quvurlar qum va tosh aralashmalari bilan to‘lib qolganligi sababli sel suvlarini aholi yashash xonadonlarigacha kirishi kuzatilgan.
Toshqin oqibatida fuqarolarga hech qanday tan jarohatlari yetmagan.
