Jizzaxda tibbiyot xodimlari bemorni zambildan tushirib yuborgani rostmi?
Holat bo‘yicha SSV ma’lumot berdi.
Ijtimoiy tarmoqda “Arnasoy” yozuvi tushirilgan tez tibbiy yordam avtomashinasi yonida bemor zambildan beixtiyor yerga yiqitib yuborilgani aks etgan videolavha tarqaldi. Holat yuzasidan SSV matbuot xizmati rasmiy izoh berdi.
Qayd etilishicha, joriy yilning 23-24 aprel kunlari Jizzax viloyati Arnasoy tumanida uyushmagan yoshlar o‘rtasida “Quvnoqlar va zukkolar” respublika ko‘rik-tanlovi o‘tkazilgan. Ijtimoiy tarmoqda tarqalgan videorolik tuman madaniyat markazi rejissyori B.Ayyubov tomonidan hududdagi “Gʻafur Gʻulom”, “Gʻoliblar”, “Bobur” va “Oltin vodiy” MFY yoshlaridan iborat “Shovvozlar” terma jamoasi uchun maxsus suratga olingan.
Shundan so‘ng bu lavha mazkur jamoa a’zolarining ijtimoiy tarmoqlardagi shaxsiy sahifalariga “Quvnoqlar va zukkolar uchun maxsus” tagso‘zi ostida joylangan. Ammo keyinchalik ayrim blogerlar tomonidan noto‘g‘ri talqin qilingan holda internet tarmoqlariga tarqatib yuborilgan.
Ta’kidlanishicha, ushbu videolavhadagi noxush holatga tez tibbiy yordam tizimining, xususan, Arnasoy tuman tibbiyot birlashmasi tez tibbiy yordam brigadasi xodimlarining mutlaqo aloqasi yo‘q.
“Shu bois vazirlik fuqarolardan ijtimoiy tarmoqlarda tibbiyot xodimlari obro‘siga putur yetkazadigan bu kabi asossiz axborot va videolavhalarni tarqatmasliklarini so‘rab qoladi”, — deyiladi rasmiy xabarda.
