Buxoroda 30 yoshli ayol eri bilan janjallashib, o‘z joniga qasd qilmoqchi bo‘ldi
U istirohat bog‘idagi daraxtga o‘zini osgan vaqtida qutqarib qolingan.
Buхoro shahrida “Somoniylar istirohat bog‘i”dagi daraxtga o‘zini osmoqchi bo‘lgan ayol qutqarib qolindi. Bu haqda Milliy gvardiyaning Buxoro viloyati bo‘yicha boshqarmasi xabar berdi.
Qayd etilishicha, voqea kecha, 30-aprel kuni soat 20.30 atrofida sodir bo‘lgan. “Somoniylar istirohat bog‘i”da jamoat tartibini ta’minlashga jalb qilingan Milliy gvardiya xodimlari bog‘ning daraxt gavjum qismida o‘z joniga suiqasd qilishga uringan ayolni daraxtda osig‘liq holatda, tipirchilayotgan vaqtda qutqarib qolishgan.
Surishtiruv davomida ayolning Gʻijduvon tumanida tug‘ilgani va hozirda Vobkent tumanida istiqomat qilishi, shuningdek, 2 nafar farzandi borligi aniqlangan. Ma’lum bo‘lishicha, ayol turmushidan ajrashgan va bir necha oy avval eri bilan janjallashib qolib, shundan so‘ng o‘z joniga qasd qilishga uringan.
Ayni paytda fuqaroning ahvoli qoniqarli hamda hodisa yuzasidan dastlabki surishtiruv harakatlari olib borilmoqda.
