Shavkat Mirziyoyev Turkiya Prezidenti bilan telefon orqali muloqot qildi
Suhbat davomida ikki davlat rahbari bir-birini Ramazon hayiti bilan qutladi.
Bugun, 2 may kuni O‘zbekiston Respublikasi Prezidenti Shavkat Mirziyoyevning Turkiya Respublikasi Prezidenti Rejep Tayyip Erdog‘an bilan telefon orqali muloqoti bo‘lib o‘tdi.
Davlat rahbarlari butun musulmon olami uchun muqaddas ayyom – Ramazon hayiti munosabati bilan bir-birini va ikki mamlakatning birodar xalqlarini samimiy qutlab, tinchlik-osoyishtalik, farovonlik va ravnaq tilaklarini izhor qildilar.
Joriy yil mart oyida O‘zbekistonga amalga oshirilgan oliy darajadagi tashrifda samarali natijalarga erishilgani, ular ikki tomonlama munosabatlarni keng qamrovli strategik sheriklik darajasiga ko‘tarishga xizmat qilgani katta mamnuniyat bilan qayd etildi.
Yil boshidan ikki tomonlama savdo hajmi qariyb 20 foizga oshdi. Mamlakatda Turkiyaning yetakchi kompaniyalari ishtirokida zamonaviy sanoat quvvatlarini yaratish va infratuzilmani modernizasiya qilish bo‘yicha yirik investisiya loyihalari davom ettirilmoqda. Ta’lim va madaniy-gumanitar sohalardagi hamkorlik kengaymoqda.
O‘zbekiston va Turkiya yetakchilari xalqaro siyosatning dolzarb masalalari yuzasidan ham fikr almashdilar, Turkiy davlatlar tashkilotining navbatdagi sammitiga tayyorgarlik ko‘rish masalalarini muhokama qildilar.
Prezidentlarning telefon orqali muloqoti har doimgidek ishonch va do‘stlik ruhida o‘tdi.
