Jizzaxda sel 20 yoshli fuqaroni oqizib ketdi
Holat yuzasidan FVV ma’lumot berdi.
Bugun, 4-may kuni Jizzax viloyati Zomin tumanidagi tog‘li hududlarda kuchli yog‘ingarchilik bo‘ldi. Bu haqda FVV axborot xizmati xabar berdi.
Qayd etilishicha, tumanning “Pishog‘ar”, “Achchi” va “Sho‘rcha” qishloqlaridan o‘tgan soylardan sel suvlarinining oqishi kuzatilgan.
Hodisa oqibatida sel suvlari “Jizzax—Zomin” avtomobil yo‘li ostida o‘rnatilgan quvurlarga sig‘masdan, ushbu yo‘lning 25-, 26- va 27-kilometrlari ustidan toshib, yana soy o‘zani bo‘ylab oqib o‘tgan.
Voqea joyiga yetib borgan qutqaruvchilar suvda oqib kelayotgan “Pishog‘ar” QFY Qong‘li qishlog‘ida yashovchi 20 yoshli fuqaroni qutqarib olgan. Hozirda ushbu fuqaroning ahvoli yaxshi, tan jarohati olmagan.
Viloyat FVB qutqaruvchilari tegishli xizmatlarning kuch va vositalari bilan sel suvlari toshgan ko‘chalar, aholi xonadonlari o‘rganishmoqda. Yo‘llarda xavfsizlik YPX xodimlari tomonidan nazoratga olingan.
Eslatib o‘tamiz, 20 aprel kuni Jizzax viloyatida kuzatilgan sel Forish tumanidagi 100 dan ortiq qabrlarni oqizib ketgandi.
