Sportchi Elbek Rahimovning qotillari 20 yilgacha qamaldi
Jinoyat yuzasidan 26 kishi sud qilindi. Ularning 3 nafari ichki ishlar organi xodimi bo‘lgan.
2021-yilning avgust oyida Qashqadaryoda 31 yoshli sportchi Elbek Rahimovni bir guruh yigitlar urib, o‘ldirishgani xabar qilingandi. Qotillik yuzasidan Jinoyat kodeksining 97-moddasi (“Qasddan odam o‘ldirish”) bilan ish qo‘zg‘atilgan.
Bugun, 5-may kuni Qashqadaryo viloyat sudida 26 nafar sudlanuvchiga nisbatan jinoyat ishini ko‘rib chiqish bo‘yicha sud jarayoni nihoyasiga yetdi va sud hukmi e’lon qilindi. Bu haqda Oliy Sud matbuot xizmati xabar berdi.
Qayd etilishicha, sudlanuvchilarning barchasi Qashqadaryo viloyatida tug‘ilgan bo‘lib, ularning 3 nafari voyaga yetmagan shaxs, 3 nafari esa ichki ishlar organlarining sobiq xodimlari hisoblanadi.
Sud hukmiga ko‘ra, sudlanuvchilarning 19 nafariga 3 yildan 20 yilgacha bo‘lgan muddatlarga ozodlikdan mahrum qilish jazosi, 1 nafariga 2 yil muddatga ozodlikni cheklash jazosi, voyaga yetmagan shaxslarga 5 yil 6 oydan 10 yilgacha bo‘lgan muddatlarga ozodlikdan mahrum qilish jazosi hamda IIOning sobiq xodimlariga 3 yildan 8 yilgacha bo‘lgan muddatlarga ozodlikdan mahrum qilish jazosi tayinlangan.
Marhumning qonuniy vakili foydasiga 11 nafar sudlanuvchidan solidar tartibda 10 mln 800 ming so‘m moddiy zarar va 150 mln so‘m miqdorida ma’naviy zarar undirilishi belgilangan.
