O‘zbekistonning yana 3 viloyatida “Texnopark” quriladi
Prezident bu bo‘yicha Samarqand, Toshkent va Farg‘ona viloyati hokimliklariga topshiriq berdi.
Bugun, 6-may kuni Prezident Shavkat Mirziyoyev huzurida elektrotexnika tarmog‘ida foydalanilmayotgan imkoniyatlar va yangi zaxiralarni safarbar qilish bo‘yicha ustuvor vazifalar yuzasidan yig‘ilish bo‘lib o‘tmoqda. Bu haqda Prezident matbuot xizmati xabar berdi.
Yig‘ilishda mutasaddilarga yana 1,5 milliard dollarlik yangi loyihalar ro‘yxatini shakllantirish, Samarqand, Toshkent, Farg‘ona viloyatlari hokimlariga Toshkent shahridagi “Texnopark” kabi elektrotexnika klasterlarini yo‘lga qo‘yish topshirildi.
Misni qayta ishlashni joriy yilda 37 foizdan 50 foizga, 2026-yilda 70 foizga yetkazish maqsadi belgilandi.
Buning uchun Ohangaron tumanidagi yangi mis klasterida 168 million dollarlik 12 ta loyiha doirasida yana 90 ming tonna misni qayta ishlaydigan quvvatlar yaratiladi.
Yig‘ilishda muqobil elektr energiyasi loyihalarini mahalliy butlovchi qismlar bilan ta’minlash masalasi ham muhokama qilindi. Shuningdek:
— xonadonlarga muqobil energiyada ishlaydigan suv isitish tizimini o‘rnatish xarajatlari 30 foizgacha qoplab beriladi;
— bog‘cha, maktab, kasalxona va boshqa ijtimoiy obyektlarda muqobil energiyada ishlaydigan suv isitish tizimlarini, ko‘chalarda esa, quyosh energiyasida yoritish moslamalarini o‘rnatish bo‘yicha alohida dastur qabul qilinadi.
Bu maqsadlarga har yili kamida 100 milliard so‘m yo‘naltiriladi.
