Toshkentda 9-may kuni bayram salyuti otiladi
Shuningdek, sana arafasida frontdan kelgan maktublarni jamlagan kitoblar chop etilishi ko‘zda tutilgan.
9 may — Xotira va qadrlash kuniga bag‘ishlab Toshkent shahrida bayram salyuti otilishi maʼlum bo‘ldi. Bu haqda Mudofaa vazirligi matbuot kotibi AOKAda o‘tkazilgan brifingda xabar qildi.
Qayd etilishicha, vazirlik tomonidan sana munosabati bilan frontdan kelgan maktublarni jamlagan «Askar maktublari» hamda «Vatan fidoyilari» kitoblarining nusxalari tayyorlangan bo‘lib, ularni bayram arafasida nashrdan chiqarish ko‘zda tutilgan.
Bundan tashqari, «G‘alaba bog‘i» yodgorlik majmuasida , «Vatan uchun jon fido qilganlar yodi mangu barhayot» nomli ekspozitsiya yaratilgan. Mazkur ekspozitsiya orqali Ikkinchi jahon urushida bir oilaning ikki va undan ortiq qatnashgan farzandlari yod etiladi. Maʼlum qilinishicha, bayram salyuti poytaxtimizda 9—may kuni soat 21:00 atrofida tashkil etiladi.
