Andijonda masjidlardan elektr ta’minoti uchun 74 mln ortiqcha mablag‘ undirilgani aniqlandi
Hozirda mazkur holat yuzasidan qayta hisob-kitob ishlari olib borilmoqda.
“Andijon HETK” AJ tomonidan viloyatdagi masjidlarga 2019–2021-yillarda elektr energiyasi uchun belgilangan tariflar noto‘g‘ri qo‘llanilgani aniqlandi. Bu haqda Monopoliyaga qarshi kurashish qo‘mitasi axborot xizmati xabar berdi.
Qayd etilishicha, Vazirlar Mahkamasining tegishli qaror va farmoyishi bilan O‘zbekiston Respublikasi hududidagi diniy tashkilotlarga 2003-yil 1-sentyabridan boshlab ularga ko‘rsatiladigan kommunal xizmatlarga to‘lovlarni aholi uchun belgilangan tariflar bo‘yicha to‘lanishi belgilangan.
Shunga qaramay, “Andijon HETK” AJ tomonidan 2019-2021-yillarda viloyatdagi 44 ta diniy tashkilotlarga aholi uchun belgilangan narx (295 so‘m) qo‘llanilmay, ulgurji iste’molchilar uchun belgilangan narx (450 so‘m) qo‘llanilgan. Buning natijasida masjidlardan jami 74 mln 378 ming so‘m ortiqcha daromad olinganligi aniqlangan.
Hozirda Monopoliyaga qarshi kurashish qo‘mitasining Andijon viloyati hududiy boshqarmasi tomonidan “Andijon HETK” AJning noto‘g‘ri hisoblagan 74 mln 378 ming so‘m mablag‘lari masjidlarga qayta hisob-kitob qilish ishlari amalga oshirilmoqda.
