Navoiyda muhandis 1000 dollar pora bilan qo‘lga tushdi
U tadbirkorga quduq qazish ishlarida “yordam” bermoqchi bo‘lgan.
Navoiy viloyatida tadbirkorning 1000 AQSH dollarini qo‘lga kiritmoqchi bo‘lgan bosh muhandis ushlandi, deya xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti.
Qayd etilishicha, Departamentning Navoiy viloyati boshqarmasi hamda DXX xodimlari ishtirokida tadbirkorlik sub’yektlarining huquqlarini himoya qilish yuzasidan tezkor tadbir o‘tkazilgan.
Tadbir davomida “I.K.” MCHJ bosh muhandisi “Gʻ.” MCHJ rahbaridan uni Navbahor tuman hududida tik quduq qazish ishlarini amalga oshirish uchun pudratchi tashkilot sifatida ishtirok etishini tanishlari yordamida hal qilib berish evaziga 1 000 AQSH dollarini firibgarlik yo‘li bilan olgan vaqtida ashyoviy dalillar bilan ushlangan.
Hozirda mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Eslatib o‘tamiz, avvalroq Navoiyda 2 ming AQSH dollari evaziga o‘qishga kiritib qo‘yishni va’da qilgan fuqaro qo‘lga olingandi.
