Qashqadaryoda 16 yoshli qiz o‘z joniga qasd qildi
Voqeadan avval o‘qituvchilardan biri uni telefondan foydalangani uchun tergagani aytilmoqda.
5-may kuni Qashqadaryo viloyatining Qamashi tumanida joylashgan 16-maktab o‘quvchisi o‘z joniga qasd qildi. Bu haqda “Nasafnews” xabar berdi.
Qayd etilishicha, maktabning 9-sinf o‘quvchisi darsdan so‘ng uyiga borgan va arqon bilan o‘zini osib, vafot etgan.
Ma’lumotlarga ko‘ra, qiz 2006-yilda tug‘ilgan. Voqeadan avval o‘qituvchilardan biri uni telefondan foydalangani uchun tergagan va dars vaqtida telefon ishlatish mumkin emasligini aytgan.
Hozirda holat yuzasidan Qamashi tumani prokuraturasi tomonidan tergovga qadar surishtiruv harakatlari olib borilmoqda. Tekshirish doirasida mutasaddi idoralar (maktab, IIB va MFY) xodimlariga nisbatan xizmat tekshiruvi tayinlangan.
Eslatib o‘tamiz, avvalroq Buxoro shahrida 30 yoshli ayol eri bilan janjallashib qolib, o‘zini daraxtga osgan vaqtida Milliy gvardiya xodimlari tomonidan qutqarib qolingandi.
