“Katta yettilik” davlatlari Rossiyaga yangi sanksiyalar kiritmoqchi
Ayni paytda G7 davlatlari va Zelenskiy ishtirokida onlayn konferensiya bo’lib o’tmoqda.
Bugun, 8-may kuni “Katta yettilik” davlatlari yetakchilari va Zelenskiyning virtual uchrashuvi bo’lib o’tmoqda. Unda Rossiyaga qarshi yangi sanksiyalarni kiritish muhokama qilinishi mumkin. Bu haqda “Bloomberg” axborot agentligi xabar berdi.
“Onlayn uchrashuv mamlakatlar uchun har qanday chora-tadbirlarni muvofiqlashtirish va potentsial takomillashtirish imkoniyatini beradi”, — deb yozadi agentlik.
Bundan oldin AQSG prezidenti Jo Bayden Vashington Rossiyaga qarshi yangi sanksiyalar kiritishga doim ochiq ekanligini va buni “G7”dagi hamkorlar bilan muhokama qilishini aytgandi.
“Katta yettilik” yig‘ilishi YIda Rossiyaga qarshi sanksiyalarning oltinchi paketiga tayyorgarlik ko‘rish fonida bo‘lib o‘tadi. Xabar qilinishicha, YI davlatlarining doimiy vakillari yangi choralar, xususan, Rossiya neftini import qilishni taqiqlash bo‘yicha haligacha konsensusga erisha olmagan.
