Sirdaryoda qimorbozlar guruhi qo‘lga tushdi
Jami 8 mln so‘m va 1050 AQSH dollari ashyoviy dalil sifatida olingan.
6-may kuni Sirdaryo viloyatida qimorxona tashkil etib, giyohvandlik vositalari iste’mol qilayotgan shaxslar qo‘lga olindi. Bu haqda viloyat IIB xabar bermoqda.
Ma’lum qilinishicha, shu kuni soat 21.45 atrofida viloyat IIB va DXX xodimlari tomonidan Mirzaobod tumanida tezkor tadbir o‘tkazilgan. Tadbir davomida tumanning M. Ulug‘bek mahallasida joylashgan yonilg‘i quyish shoxobchasida qimor o‘ynayotgan 6 nafar shaxs qo‘lga olingan. Ularning o‘yin uchun tikkan 7 mln va 1050 AQSH dollari, shuningdek, 3 litrli shisha idishda alohida o‘yin tashkilotchisiga ajratilgan 1 mln so‘m miqdoridagi pullari ashyoviy dalil sifatida olingan.
Hozirda mazkur holat yuzasidan tergovga qadar tekshiruv harakatlari olib borilmoqda.
