Ukrainadagi urush yillab davom etishi mumkin
NATO bosh kotibi mojaroning boshqa davlatlarga tarqalib ketmasligi uchun tezkor choralar ko‘rish lozimligini aytdi.
NATO Ukrainani qo‘llab-quvvatlaydi, lekin mojaroni kattalashtirish niyatida emas. Ittifoq Bosh kotibi Yens Stoltenberg “Welt am Sontag” gazetasiga bergan intervyusida urushning boshqa davlatlarga tarqalishini oldini olish kerakligini aytdi.
“Afsuski, biz Ukrainada oylar va hatto yillar davom etishi mumkin bo‘lgan uzoq urushga tayyor bo‘lishimiz kerak. Uzoq muddatda Ukraina faqat Sovet Ittifoqi qurollari bilan o‘zini himoya qila olmaydi va Gʻarbning zamonaviy qurollariga o‘tishi kerak. Ukraina ko‘proq og‘ir qurollarga muhtoj, Gʻarb ta’minotni kuchaytirishi kerak.
Biz bu davlatni qo‘llab-quvvatlaymiz, ammo NATO ongli ravishda urush ishtirokchisi emas. Shuning uchun biz Ukrainaga NATO qo‘shinlarini jo‘natmaymiz”, — deya tushuntirdi alyans rahbari.
