Zomindagi aholi yashash joylarida bo‘rilar izg‘ib yurgani rostmi?
Holat yuzasidan viloyat Ekologiya boshqarmasi rasmiy izoh berdi.
Ijtimoiy tarmoqda Zomin tumani hududida bo‘rilar yurgani aks etgan video tarqaldi. Holat yuzasidan Jizzax viloyat Ekologiya va atrof muhitni muhofaza qilish boshqarmasi rasmiy munosabat bildirdi.
Qayd etilishicha, bo‘rilar aynan Zomindagi shaharcha hududida yurganligi tasdiqlanmagan. Bo‘rilar Jizzax viloyatining tog‘li hududlarida uchraydi va yashaydi. Ammo so‘nggi yillarda bo‘rilarning aholiga tashlanganligi yoki shikastlantirish holatlari aniqlanmagan.
“Ijtimoiy tarmoqda foydalanuvchilar tomonidan bo‘riga o‘xshash bo‘lgan itlar bo‘ri ovozi bilan tasvirlangan videolavhalar joylashtirilmoqda. Ushbu lavhalar feyk xabar bo‘lib, ijtimoiy tarmoq foydalanuvchilaridan bu kabi xabarlarni tarqatib, aholini vahimaga solmasliklarini so‘raymiz”, — deyiladi xabarda.
