Ukrainaning Yevroittifoqqa qachon kirishi ma’lum bo‘ldi
Bu bo‘yicha Yevrokomissiya rahbari xabar berdi.
Yevrokomissiya Ukrainadan Yevropa Ittifoqiga kirish bo‘yicha so‘rovnomaning ikkinchi qismini olishni kutmoqda. Kiyevga nomzod maqomini berish-bermaslik bo‘yicha qaror iyun oyida qabul qilinadi. Bu haqda Yevrokomissiya rahbari ma’lum qildi.
“Kecha “Yettilik guruhi” prezident Zelenskiy bilan muzokaralar o‘tkazdi. Biz Ukrainani Yevropa yo‘lida qo‘llab-quvvatlashni muhokama qildik. Anketaning ikkinchi qismini olishni intiqlik bilan kutaman. Yevropa o‘z qarorini iyun oyida qabul qilmoqchi”, — deb yozdi u Twitterda.
Avvalroq Zelenskiy Twitterda Ukraina Bryusselga so‘rovnomaning ikkinchi qismini taqdim etishi, uning asosida Yevrokomissiya Ukrainaga YeI nomzodi maqomini berish bo‘yicha tavsiya berishi kerakligini aytgan edi.
Kiyev o‘z so‘rovnomasining birinchi qismini 17-aprel kuni Bryusselga topshirgan.
Bu boradagi muhokamalar jarayoni bir necha yil davom etishi mumkin. Finlyandiya bu yo‘lni eng tez - uch yil ichida bosib o‘tdi. Eng uzuni Turkiya bo‘lib, u 2005 yilning kuzida Yevropa Ittifoqiga kirish bo‘yicha muzokaralarni boshlagan. Bugungi kunga kelib ham ularni yakunlash istiqbollari ko‘rinmayapti.
