Makron Orbanni Rossiya neftidan voz kechishga ko‘ndirmoqchi
Fransiya yetakchisi bugun Vengriya bosh vaziri bilan telefonda gaplashadi.
Emmanuel Makron Vengriya bosh vaziri Viktor Orban bilan telefon orqali muloqot qilmoqchi. Bundan ko‘zlangan maqsad Rossiya neftiga qarshi embargo bo‘yicha kelishuvga erishish ekanligi aytilmoqda.
Fransiya TIV qoshidagi Yevropa ishlari bo‘yicha davlat kotibi Kleman Bonning so‘zlariga ko‘ra, Makron bundan tashqari, Yevropa Komissiyasi raisi Ursula fon der Lyayer bilan ham gaplashib olmoqchi. Uning qo‘shimcha qilishicha, hozirda qandaydir qaror qabul qilish uchun YEIning barcha 27 aʼzosi roziligi zarur.
Vengriya Rossiya neftiga embargo qo‘yilishiga qatʼiy qarshilik qilib kelmoqda. Mamlakat “qora oltin”ning katta qismini Moskvadan sotib oladi.
Shuningdek, Bon RFga qarshi sanksiyalarning oltinchi paketi yaqin kunlarda tasdiqlanishini aytgan. Davlat kotibi rus neftidan voz kechish og‘riqli bo‘lishini tan olgan. U hozirda boshqa yetkazib beruvchilar bilan muzokaralar ketayotganini maʼlum qilgan.
Avvalroq YEI neft embargosi masalasida kelisha olmagani to‘g‘risida xabar berilgandi.
