Samarqandlik tadbirkor 700 mln so‘m kredit mablag‘ini “yeb ketdi”
U yer maydoniga tomchilatib sug‘orish texnologiyalari olib kelish maqsadida jinoyat sodir etgan.
Bosh prokuratura huzuridagi Departamentning Kattaqo‘rg‘on tuman bo‘limi tomonidan o‘tkazilgan tergovga qadar tekshiruvda, “M.B.” fermer xo‘jaligi rahbari A.X.ning jinoyat sodir etgani aniqlandi.
Maʼlum bo‘lishicha, u Kattaqo‘rg‘on tumanining “Yangihayot” massividagi 40 gektar paxta yer maydoniga tomchilatib sug‘orish texnologiyalarini olib kelib o‘rnatish uchun bank muassasasidan 700 mln so‘m kredit olishga muvaffaq bo‘lgan, biroq pullarni o‘zlashtirishni ko‘zlab, yer maydonining 26 gektariga eski va sifatsiz uskunalarni o‘rnatgan. Keyinchalik uskunalarni yana qaytarib olib ketib, kredit mablag‘ini o‘z shaxsiy manfaatlari yo‘lida sarf etgan.
Mazkur holat yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishi qo‘zg‘atilib, tergov harakatlari o‘tkazilmoqda.
