Qashqadaryoda qo‘li go‘sht maydalagich ichiga kirib ketgan bolaning sog‘ligi qanday?
Shifokorlar 2 yoshli bolada murakkab jarrohlik amaliyoti o‘tkazilganini aytmoqda.
Joriy yilning 8-may kuni Qashqadaryo viloyatida 3 yoshli bolaning chap qo‘li ehtiyotsizlik sabab go‘sht maydalagich ichiga kirib qolgani xabar qilingandi.
Shundan so‘ng FVV qutqaruvchilari tibbiyot xodimlari bilan birgalikda qurilmaning metal bo‘lagini kesib tashlash orqali bolaning qo‘lini undan chiqarib olishgandi.
Hozirda bolakay Qarshi shahridagi shoshilinch tez tibbiy yordam markazida davolanmoqda.
Shifokorning so‘zlariga ko‘ra, bola kasalxonaga olib kelinganida uning chap qo‘lida katta hajmda ezilib, yirtilgan jarohat bo‘lgan. Shuningdek, bilak, tirsak va kaft suyaklarining sinishi kabi belgilar aniqlangan. Tibbiyot xodimlari tomonidan jarohatga birlamchi ishlov berish va mahalliy plastik operatsiyalari o‘tkazilgan.
“Nasafnews” muxbirining aniqlik kiritishicha, bola 3 yosh emas, endigina 2 yoshla to‘ladi. Ular viloyatning Gʻuzor tumanida istiqomat qilishadi. Bolaning otasi ayni paytda boshqa davlatda. Ona esa turmush o‘rtog‘iga mazkur voqeani bildirmagan.
