Vengriya bir shart asosida Rossiya neftiga qarshi embargoni qo‘llab-quvvatlashi mumkin
Mamlakat TIV bu shartni ochiqladi.
Vengriya Rossiya neftiga qarshi embargoga qo‘shilish shartini aytdi. Buni mamlakat tashqi ishlar vaziri Peter Siyarto maʼlum qildi.
Unga ko‘ra, embargo oqibatlarini bartaraf etish bo‘yicha Yevropa Komissiyasi aniq takliflar bersagina, Budapesht rus neftiga sanksiya joriy etilishiga rozi bo‘ladi. Bundan tashqari, diplomat cheklovlar Vengriyaga quvurlar orqali kirib keladigan “qora oltin”ga taʼsir o‘tkazmasligi kerak.
“Yevroittifoqning RF neftiga qarshi taqiqi kuchga kirsa, bu Vengriyaning energetik xavfsizligiga jiddiy taʼsir o‘tkazadi. Bu iqtisodiy atom bombasiga teng. Vengriyada yoqilg‘i narxi 55-60 foizga ko‘tarilib ketadi. Bu esa barcha tovarlar narxining oshishiga olib keladi. Mamlakat buni ko‘tara olmaydi”, – degan Siyarto.
Avvalroq Makron Vengriya bosh vaziri Viktor Orban bilan neft embargosi masalasida muloqot o‘tkazishi xabar qilingandi.
