Samarqandda “Nexia” kanalga ag‘darilib ketdi
Hodisa oqibatida mashina ichida bo‘lgan 3 nafar yo‘lovchi halok bo‘ldi.
Samarqand viloyati Samarqand tumanida 8 may kuni “Nexia” avtomobilining kanalga tushib ketishi 3 kishining hayotiga zomin bo‘ldi. Bu haqda viloyat Ichki ishlar boshqarmasi axborot xizmati xabar berdi.
Xabarda aytilishicha, soat tungi 02:40 atrofida tumanning Badal MFY hududida harakatlanib ketayotgan “Nexia” avtomobili haydovchisi boshqaruvni yo‘qotishi oqibatida kanalga ag‘darilgan.
Mashinaning old o‘rindiqlarida bo‘lgan haydovchi va yo‘lovchi suvdan chiqishga ulgurgan, orqa o‘rindiqlarda ketayotgan 15, 16 hamda 29 yoshli 3 nafar yigitlar halok bo‘lgan. Ularning ikki nafari maktab o‘quvchisi bo‘lgan.
Mazkur holat yuzasidan Jinoyat kodeksining 266-moddasi (Transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, tergov harakatlari olib borilmoqda.
