Sel So‘x-Rishton yo‘lidagi transport harakatini chekladi
Toshqin oqibatida uylar yerto‘lalari va ba’zi binolar suv ostida qolgan.
Favqulodda vaziyatlar vazirligi bergan xabarga ko‘ra, 11-may kuni kechqurun yog‘gan qisqa muddatli yomg‘ir tufayli Farg‘ona viloyatining So‘x va Farg‘ona tumanlarida sel oqimi kuzatildi.
Ma’lum bo‘lishicha, So‘x tumani Malbut va Devayron qishloqlari sel yo‘llaridagi suvning soy o‘zanidan toshib ketishi So‘x-Rishton avtomobil yo‘lining qatnov qismiga loy va tog‘ jinslarini olib kelgan. Natijada avtotransport harakati vaqtinchalik to‘xtatildi.
Sel oqibatida Malbut qishlog‘idagi uylar yerto‘lalari, binolar hamda tomorqa yerlari suv ostida qolgan. Hozirda muhandislik texnika vositalaridan foydalangan holda ofat oqibatlari bartaraf etilmoqda.
Tuman hokimi boshchiligida qutqaruvchilar va boshqa xizmat vakillari tomonidan seldan jabr ko‘rgan xonadonlar soni aniqlanmoqda.
