Andijonda hokim yordamchisi nima uchun o‘zini osdi?
Holat bo‘yicha qo‘shimcha ma’lumot berildi.
Avvalroq Andijon viloyatining Marhamat tumanida hokim yordamchisi o‘z yashash xonadonidagi molxonada o‘zini osib, vafot etgani xabar qilingandi. Tuman hokimligi matbuot xizmati xolat yuzasidan rasmiy munosabat bildirdi.
Ma’lum qilinishicha, Mirzaraximov Farxod Azimovich “Polvontosh” mahalla fuqarolar yig‘inida 2022 yil 11 yanvardan boshlab hokim yordamchisi lavozimida ishlagan.
Uning dadasi A. Mirzaraximov 2021 yilda og‘ir xastalikka chalingani, so‘ngra, onasi R. Mirzaraximova og‘ir xastalik bilan kasallanib, vafot etganidan so‘ng F.Mirzaraximov ishga sovuqqonlik bilan qaragan.
Oilasida yuzaga kelgan kelishmovchiliklar sababli spirtli ichimliklarga ruju qo‘ygan. 2022 yil mart oyi davomida bir necha bor ogohlantirilishiga qaramasdan, ichkilik ichishni davom ettirgan. 2022 yil 1 aprel kuni o‘z ixtiyori bilan ishdan bo‘shash to‘g‘risida ariza bergan.
“Ijtimoiy tarmoqlarda yozilayotgan ushbu holat lavozimidan bo‘shaganidan so‘ng bo‘lganligini ma’lum qilamiz”, — deyiladi xabarda.
