Qashqadaryoda hokim yordamchisi pora bilan ushlandi
Hokimlik uning bu harakatini lavozimi bilan bog‘liq emasligini aytmoqda.
Qashqadaryo viloyatining Gʻuzor tumanida hokim yordamchisi 300 dollar pora bilan qo‘lga tushdi. Holat yuzasidan hokimlik rasmiy munosabat bildirdi.
Ma’lum qilinishicha, fuqaro E.F. muqaddam viloyat Bandlik boshqarmasida bo‘lim boshlig‘i lavozimida faoliyat ko‘rsatgan. 2022 yilning 12 yanvarida Gʻuzor tumanidagi “Jonbuloq” mahallasiga hokim yordamchisi etib tayinlangan. Uning yangi lavozimga qo‘yilishida avvalgi ish joyidan ijobiy tavsiflanganligi e’tiborga olingan.
2022 yilning o‘tgan davri mobaynida hokim yordamchilari tomonidan yangi ish o‘rinlarini yaratish, aholi bandligini ta’minlash va xalqni rozi qilish yo‘lida bir qator ijobiy ishlar amalga oshirilgan.
Shuningdek, korrupsiya holatlarni oldini olish maqsadida hokim yordamchilari faoliyati tuman hokimligi, sektor rahbarlari hamda mahallabay ishlash va tadbirkorlikni rivojlantirish tuman markazi tomonidan doimiy nazorat qilib borilib, bu borada uchrashuv va targ‘ibot ishlari o‘tkazilgan. Uchrashuvlar davomida hokim yordamchilaridan kafolat xatlari olinib, jarayonlar tegishli tartibda rasmiylashtirilgan.
Shunga qaramasdan, joriy yil 12 may kuni hokim yordamchisi E.F. o‘z vakolatiga kirmaydigan ish — Qarshi tumanida yashovchi fuqaroni Respublika shoshilinch tibbiy yordam ilmiy markazi Qashqadaryo filialiga feldsher lavozimiga ishga kiritib qo‘yishni va’da qilib, evaziga firibgarlik yo‘li bilan 300 AQSH dollarini olgan vaqtda jinoyat ustida qo‘lga olingan.
“Shu bois, hokimlik E.F. tomonidan sodir etilgan firibgarlik jinoyatini oqlab bo‘lmasligini ta’kidlash bilan bir qatorda, uning mazkur jinoiy harakati “Jonbuloq” mahallasi hokim yordamchisi lavozimi bilan bog‘liq emasligini ma’lum qiladi”, — deyiladi xabarda.
