Ayrim mahsulotlarning kunlik “optom” narxlari maʼlum  qilindi

Vazirlik axborot xizmati xabariga ko‘ra, kuzatuvlar natijasida Respublika bo‘yicha qishloq xo‘jaligi mahsulotlari narxlari yuzasidan Qo‘yliq ulgurji bozori, go‘sht mahsulotlari bo‘yicha esa Eski juva dehqon bozorida shakllangan narxlar mo‘ljal bo‘lib xizmat qiladi.

Tadbirkorlar va qishloq xo‘jaligi mahsulotlarini yetishtiruvchi fermer va dehqon xo‘jaliklarining takliflarini inobatga olgan holda:

1. Asosiy turdagi qishloq xo‘jaligi mahsulotlari narxlarini kuzatib borish metodologiyasi ishlab chiqilib, bozorlarga keltirilayotgan mahsulotlar narxlarini onlayn rejimda kunlik monitoring va eʼlon qilib borish amaliyoti yo‘lga qo‘yilmoqda.

Qo‘yliq ulgurji bozorida – 24 turdagi meva, sabzavot va poliz mahsulotlari narxlari bo‘yicha maʼlumotlar ertalab soat 5:00 dan 7:00 ga qadar; Chorsu bozorida – mol va qo‘y go‘shti narxlari bo‘yicha maʼlumotlar ertalab soat 5:00 va 8:00 oralig‘ida yig‘iladi.

Ushbu tizimning amaliyotga joriy qilinishi dastlabki bosqichda qishloq xo‘jaligi mahsulotlarini yetishtiruvchi fermer va dehqonlar hamda ulgurji va chakana savdodagi tadbirkorlar uchun zaruriy maʼlumotlar bazasi vazifasini bajaradi hamda:

a) dehqon va fermerlar uchun mahsulotlarni sotish bo‘yicha shartnomalar tuzishda dalaning o‘zida joriy narxlar to‘g‘risida maʼlumotlarga ega bo‘lish imkonini beradi;

b) ushbu tizimdagi narxlar Respublikaning boshqa hududlaridagi ulgurji va chakana narxlarning shakllanishiga mo‘ljal bo‘lib xizmat qiladi hamda kelgusida tahlil va qaror qabul qilishda maʼlumotlar bazasini shakllantiradi.

Narxlar kuzatuvi amalga oshirilayotgan vaqtda qayd etiladi. Maʼlumotlarni to‘plash vaqti, sanasi hamda joyi o‘zgarishiga qarab ham, narxlarning tebranish holatini ko‘rish
mumkin.