Farg‘onada yuk mashina 3 ta avtomobil bilan to‘qnashdi
Hodisa oqibatida 1 kishi vafot etgan.
Farg‘ona viloyati Marg‘ilon shahrida 4 ta avtomashina ishtirokida yo‘l-transport hodisasi sodir bo‘ldi. Bu haqda YHXX xabar berdi.
Qayd etilishicha, voqea bugun, 14-may kuni soat 00.30 atrofida Marg‘ilon shahri hududidan o‘tuvchi 4P-112 avtomobil yo‘lining 228-kilometridagi aylanma yo‘lda sodir bo‘lgan. 1997 yilda tug‘ilgan haydovchi “Man” rusumli yuk avtomobilida harakatlanayotib, rul boshqaruvini yo‘qotgan va transport vositasi ag‘darilgan. Shundan so‘ng u yo‘l chetida to‘xtab turgan 3 ta yengil avtomobillarga to‘qnashgan.
Hodisa oqibatida to‘xtab turgan “Lacetti” avtomobilining haydovchisi, 1980 yilda tug‘ilgan fuqaro shifoxonada vafot etgan. Shuningdek, yuk avtomobili haydovchisi tan jarohati bilan shifoxonaga yotqizilgan.
Hozirda mazkur YTH yuzasidan Marg‘ilon shahar IIB huzuridagi TB xodimlari tomonidan dastlabki tergovoldi surishtiruv harakatlari olib borilmoqda.
